Abahagarariye amakoperative y’Abajyanama b’Ubuzima mu Karere ka Ruhango basuye ibikorwa by’ubworozi mu Karere ka Rubavu

Kuva tariki ya 30 Kanama kugeza ku ya 2 Nzeri 2026, mu Karere ka Rubavu, mu Mirenge ya Cyanzarwe na Rugerero, habereye urugendoshuri rwateguwe ku bufatanye n’Ikigo cy’Igihugu cy’Ubuzima (RBC), rwitabiriwe n’Umukozi ushinzwe amakoperative mu Karere ka Ruhango, abagize Inama z’Ubuyobozi n’abagenzuzi b’amakoperative 4 y’Abajyanama b’Ubuzima akorera ku bigo nderabuzima bya Munanira, Muyunzwe, Gishweru na Kigoma. Uru rugendoshuri rwatewe inkunga na JSDF ikorera muri RBC.

Muri uru rugendoshuri, basuye ibikorwa by’ubworozi bw’ingurube za kijyambere n’inkoko zitera amagi, bareba uburyo bwiza bwo kwita ku isuku n’ubuzima bw’amatungo, imirire n’umutekano wayo, ndetse n’ingamba zo guhangana n’izamuka ry’ibiciro by’ibiryo by’amatungo. Hanarebwe uburyo bwo kubungabunga umusaruro no kuwugeza ku isoko, kuvugurura amatungo no kugabanya ubucucike mu bworozi.

Abitabiriye urugendoshuri kandi bungutse ubumenyi ku guhitamo ingurube zigenewe kugurishwa n’izigenewe kororoka, gusimburanya isekurume, kuzuza neza ibitabo by’icungamutungo n’ibaruramari, imitangire y’amasoko, ndetse no gukusanya no kugurisha ifumbire y’imborera ikomoka ku bworozi.

Abitabiriye uru rugendoshuri bagaragaje ko amasomo n’ubunararibonye bakuye muri Rubavu ari ingenzi mu kunoza imikorere y’amakoperative yabo. Biyemeje kubyaza umusaruro ibyo bungukiye muri uru rugendoshuri, babishyira mu bikorwa mu bworozi no mu micungire y’amakoperative yabo, hagamijwe kongera umusaruro, inyungu n’iterambere ry’abanyamuryango.