Iyo ni imwe mu myanzuro y’inama yahuje ubuyobozi bw’Akarere n’abarimu bose bigisha mu mashuri y’inshuke, abanza, ayisumbuye n’ayigisha imyuga n’ubumenyingiro bo mu Mirenge ya Bweramana, Kabagali na Kinihira, yabereye mu cyumba cy’inama cy’Ishuri rya Koleji Karambi riherereye mu Murenge wa Kabagali ku cyumweru tariki ya 20 Ukwakira 2019.

Inama yayobowe n’Umuyobozi w’Akarere, Habarurema Valens, initabirwa n’Umuyobozi w’Akarere wungirije ushinzwe iterambere ry’ubukungu, Rusilibana Jean Marie Vianney, Umuyobozi w’Akarere wungirije ushinzwe imibereho myiza y’abaturage, Mukangenzi Alphonsine, na bamwe mu bayobozi b’inzego zishinzwe umutekano ku rwego rw’Akarere.

Atangiza iyi nama ku mugaragaro, Meya Habarurema yashimye umurimo mwiza abarimu bakora wo kurerera Igihugu, abasaba guhora bazirikana ko ari ingenzi ku gihugu cya none n’ejo hazaza, bityo bitume bihatira kurushaho kuwunoza.

Yavuze kandi ko iyi nama yateguwe muri gahunda ya Komite Nyobozi y’Akarere yo kuganira n’abakora mu byiciro binyuranye by’imirimo hagamijwe: Kumenyana, kuganira ku ruhare rwa buri kiciro mu iterambere ry’Akarere, amategeko agenga imikorere muri buri kiciro, umutekano n’uruhare rwa buri wese mu kuwusegasira, ibibazo bihari n’inzira zo kubikemura. 

Ibiganiro byatanzwe muri iyi nama: “Operation Ruhango ikeye”; Imihigo y’Akarere ka Ruhango 2019-2020; Umutekano n’uruhare rwa mwarimu mu kuwusegasira; Imicungire y’abarimu.

Mu kiganiro kuri Operation Ruhango ikeye, Umuyobozi w'Akarere wungirije ushinzwe imibereho myiza y'abaturage, Mukangenzi Alphonsine yagarutse ku bibazo bibangamiye imibereho myiza bigaragara hirya no hino mu Karere, ibimaze gukorwa mu rwego rwo kubikemura, ibisigaye n'inzira zihari zo kubikemura.

Yasabye abarimu kugira uruhare mu kubikemura binyuze mu nyigisho batanga, no mu ngero nziza bagaragaza aho batuye n’aho bagenda.

Kugira ngo babigereho ngo bagomba kuzirikana ko mwarimu agomba kuba ikitegererezo mu bandi, bityo bakaba basabwa igihe cyose kubera abandi urugero rwiza.

Yagize ati “Umwarimu aho atuye ni bandebereho. [...] Namwe mushyiremo imbaraga mwigishe abaturage”.

Ku birebana n’imihigo, Umuyobozi w'Akarere wungirije ushinzwe iterambere ry’ubukungu, Rusilibana Jean Marie Vianney, yasobanuye ko muri rusange imihigo igamije guhindura imibereho y'umuturage ikarushaho kuba myiza. 

Yagaragaje uruhare buri wese asabwa mu kwesa imihigo, n'imihigo ubuyobozi bwifuza ko abarimu bagiramo uruhare by'umwikariko: kurwanya guta ishuri kw'abana, kurwanya imirire mibi mu bana, gahunda yo korora inkoko ku bigo by'amashuri mu rwego rwo kurwanya imirire mibi, no gutoza abana korora, n'umuhigo wo gutoza abana kutera ibiti by’imbuto ziribwa no kubyitaho.

Ku birebana n’umutekano, abarezi bibukijwe ko ari inkingi ya mwamba y’ubuzima bw’Igihugu, buri wese asabwa kugira uruhare mu kuwubumbatira, by’umwihariko atanga amakuru yafasha gukumira icyo ari cyo cyose cyawuhungabanya bihereye mu muryango.

Ku rundi ruhande basazwe gutoza abana indangagaciro zikwiriye, bazirikana neza ko abo barera ari bo bazavamo abashinzwe umutekano, kandi ko kurinda umutekano bisaba kugira indangagaciro z’ubumuntu, kwanga umugayo, gukunda ikiza no kwanga ikibi aho kiva kikagera,…

Ku bijyanye n’imicungire y’abarimu, hagarutswe ku gushishikariza abarimu kumenya ibikubiye muri Sitati (Statut) yihariye igenga abakora mu burezi.

Bashishikarijwe kandi kutihererana icyo ari cyo cyose cyababangamira mu kazi kabo, no kujya bakigeza ku bayobozi kugira ngo gikemurwe hakiri kare kandi mu buryo bukwiriye.

Iyi nama yabereye mu Murenge wa Kabagali ni yo yasoje inama ubuyobozi bw’Akarere bugirana n’ikiciro cy’abakora mu burezi.