Abakozi b’Akarere ka Ruhango bakomeje gahunda ya siporo isanzwe iba buri wa Gatanu kuva saa cyenda z’amanywa kugeza saa kumi n’imwe z’umugoroba (3:00 PM – 5:00 PM), igamije guteza imbere ubuzima bwiza, kongera imbaraga no kunoza imikorere mu kazi.

Ku cyicaro cy’Akarere, Ubuyobozi bw’Akarere bwifatanyije n’abakozi mu bikorwa bitandukanye bya siporo, mu gihe no mu Mirenge na ho abakozi bitabiriye gahunda nk’iyo. Ibikorwa byakozwe birimo kwiruka, gukora imyitozo ngororamubiri, gukomeza imikaya, kuruhura ubwonko ndetse n’indi myitozo ifasha umubiri gukomeza kugira ubuzima bwiza.

Abitabiriye siporo bagaragaje ko iyi gahunda ibafasha kugabanya umunaniro uterwa n’akazi ka buri munsi, kongera imbaraga no kubafasha gukorana neza n’abandi mu mwuka mwiza w’ubufatanye.

Nyuma ya siporo, habaye ibiganiro byibanze ku mikorere y’akazi n’inshingano zo gukomeza gutanga serivisi nziza ku baturage. Ubuyobozi bw’Akarere bwashishikarije abakozi gukomeza kwitabira siporo buri gihe, busobanura ko ari kimwe mu bikoresho by’ingenzi bifasha umuntu kugira ubuzima bwiza bwo mu mutwe no ku mubiri, bityo bikamufasha gukora akazi neza kandi mu buryo butanga umusaruro.

Abakozi banibukijwe gukomeza kubungabunga isuku no gukurikiza amabwiriza y’ubwirinzi bw’indwara zandura. By’umwihariko, basabwe gukomeza kugira amakenga no kwitwararika nyuma y’uko mu gihugu gituranyi hagaragaye icyorezo cya Ebola, nubwo kugeza ubu nta bwandu bwa Ebola buragaragara mu Rwanda.

Ubuyobozi bw’Akarere bwashimangiye ko gukomeza kwimakaza imyitozo ngororamubiri, isuku n’imibereho myiza ari imwe mu nzira zo kubaka abakozi bafite ubuzima bwiza, bakora neza inshingano zabo kandi batanga serivisi zinoze ku baturage.

Gahunda ya siporo y’abakozi ikomeje kuba umwanya mwiza wo guteza imbere ubuzima, gukomeza ubusabane hagati y’abakozi no kongera imbaraga zibafasha gukorera abaturage mu buryo bunoze kandi burambye.