Nk'uko bimenyerewe buri wa kabiri gicamunsi, mu Gihugu hose haba inteko z'abagurage ku rwego rwa buri Kagali. Abayobozi mu nzego zitandukanye no mu byiciro byose begera abaturage bakaganira ku buryo bwo gukemura ibibangamira imibereho myiza n’iterambere aho batuye, gahunda zitandukanye za Leta, ndetse hanakabaho gahunda yo kwakira no gukemura ibibazo by'abaturage.

Ku gicamunsi cyo kuri uyu wa kabiri tariki 21 Werurwe 2023, Guverineri w'Intara y'Amajyepfo, Kayitesi Alice, ari kumwe n'abayobozi b'inzego z'umutekano ku rwego rw'Intara, Umuyobozi w'Akarere ka Ruhango, Habarurema Valens, abayobozi b'inzego z'umutekano ku Karere n'abayobozi b'Umurenge wa Byimana bitabiriye inteko y'Akagali ka Kirengeli yabereye mu Mudugudu wa Rusororo.

Mu butumwa yagejeje ku bitabiriye iyi nteko, Guverineri Kayitesi Alice yabanje kwibutsa ko inteko z'abaturage ari umwanya wagenwe aho abaturage bahura bakaganira kuri gahunda zigamije irerambere n'imibereho myiza, bakishimira ibyagezweho, bakungurana ibitekerezo ku byo bashaka kugeraho n'uko bazabigeraho, abayobozi bagakemura ibibazo.

Yashimiye abaturage b’Akarere ka Ruhango uruhare bagize mu kwesa imihigo y'Akarere mu mwaka wa 2021-2022 aho Akarere aka kabaye aka 7 ku rwego rw'Igihugu, asaba abaturage gukomeza gushyira imbaraga mu gukora neza ibikorwa bifasha mu kwesa imihigo neza. 

Ati “Imihigo dusinya, dusinya ko umuturage azatera imbere binyuze mu guhinga neza akeza umusaruro mwinshi yakoresheje ifumbire nziza, yakoresheje imbuto z’indobanure. Iyo uhinze neza rero ukeza, ugahinga imbuto z’indobanure, […] buriya muba muri mu nzira yo kuba aba mbere”.

“Iyo woroye neza ugatera imbere, uba uri mu nzira y’uko Akarere kawe kaba aka mbere”.

“Iyo wohereje umwana ku ishuri […] cyangwa utamufite ariko wabona uw’umuturanyi ukamubwira uti jya kwiga, burya ni imihigo y’Akarere uba urimo gukoraho”.

“Iyo ukoze isuku, ukagira ubwiherero bwujuje ibisabwa, inzu yawe ukayikurungira yangwa ukayitera sima bijyanye n’ubushobozi ufite, tabwo uba ucyikorera gusa uba urimo no gutanga umusanzu wawe ukomeye kugira ngo Akarere kawe kazakomeze kujya imbere”.

Guverineri Kayitesi Alice kandi yasabye abaturage gukora cyane bagatera imbere kuko gukira ari cyo Ubuyobozi Bukuru bw'Igihugu bwifuriza buri Munyarwanda.

Yagarutse no kuri iki gihe cy'imvura nyinshi asaba buri wese kwirinda ibiza. Yagarutse by’umwihariko kuri bimwe mu bigomba kwitabwaho muri urwo rwego harimo: nuzirika neza ibisenge by'amazu; gutunganya imigende y'amazi izengurutse amazu kugira ngo barinde ko amazi yinjira mu ntebe y'inzu; kwirinda kujugunya imyanda mu nzira z'amazi; kurwanya isuri; Kwirinda inkuba. Yasoje asaba abaturage gukoresha neza isoko rya Kirengeli no kuribyaza umuzaruro nk'igikorwa remezo bahawe na Nyakubahwa Perezida wa Repubulika.

Umuyobozi w'Ingabo mu Ntara y'Amajyepfo, Gen Emmy Ruvusha, yavuze ku mutekano yibutsa ko umutekano ari inkingi y'ibyiza byose abantu babasha kugeraho, kandi ko buri wese asabwa kugira uruhare mu gukumira ko habaho igikorwa icyo ari cyo cyose cyawangiza, aho kubyibuka ari uko hari icyawangije.

Yibukije ko mu Gihugu hose Umutekano ari ntamakemwa, abantu bakaba babasha gukoresha amasaha yose 24/24 mu bikorwa bibateza imbere. Yagarutse ku dukorwa duto tuwangiza, nk’ubujura bugenda bugaragara mu mirima, nzira no mu mazu asaba buri wese kugira uruhare mu kuwubumbatira bita by’umwihariko ku kunoza imikorere y'amarondo, gutanga ku gihe amakuru afasha gukumira ibyaha no kugorora hakiri kare urubyiruko n’abandi bose baba batangiye gutana.

Umuyobozi wa Polisi mu Ntara y’Amajyepfo, ACP Claude Tembo, na we yasabye abaturage ubufatanye mu gukumira ibishobora guhungabanya umutekano, birinda guhishira abanyabyaha n’ababikekwaho, ahubwo bagatangira amakuru ku gihe.

Ati “Dutangire amakuru ku gihe kugira ngo dukumire ibyaha bitaraba, kandi niba hari n'ibyahungabanye turebe uko twabigarura mu murongo”.

Yasabye kandi ubufatanye mu kurwanya guta ishuri kw’abana, kuko byagaragaye ko uko abana bata ishuri bakajya mu muhanda ari ko biga imico n’ingeso mbi bibaganisha mu gukora ibyaha birimo ubujura n’ibindi.

Umuyobozi w’Akarere, Habarurema Valens yagaragaje ibikorwa bitandukanye abaturage b’Umurenge wa Byimana bagezeho birimo ibikorwa remezo by’amashanyarazi n’amazi, amashuri,... Yagaragaje kandi ibikorwa bitandukanye abaturage bakora bibateza imbere harimo ubucukuzi bw’amabuye y’agairo, ndetse n’ibindi bitandukanye, asaba buri wese gukomeza kugira uruhare mu kubibungabunga no kubyongera kugira ngo bakomeze kurushaho gutera imbere.