Itsinda ry’abayobozi n’abakozi b’Akarere ka Karongi ryagiriye uruzinduko rw’akazi mu Karere ka Ruhango, hagamijwe gusangira ubunararibonye ku Ishuri ry’Ubuyobozi n’amarushanwa y’imidugudu, nk’imwe mu nkingi z’ingenzi ziteza imbere imiyoborere myiza n’iterambere rishingiye ku baturage.

Abashyitsi baturutse mu Karere ka Karongi bayobowe n'Umuyobozi w'Akarere MUZUNGU Gerald bakiriwe ku mugaragaro n’Umuyobozi w’Akarere ka Ruhango, Bwana Valens Habarurema, wabahaye ikaze anabashimira guhitamo Ruhango nk’ahantu ho kwigira ku bikorwa byiza by’imiyoborere n’iterambere rishingiye ku baturage.

Mu biganiro byabereye ku Biro by’Akarere, hatanzwe ibisobanuro birambuye ku buryo Ishuri ry’Abuyobozi ryashyizweho, intego rifite, uko rikora n’uruhare rigira mu kongerera ubushobozi abayobozi b’inzego z’ibanze n’abaturage muri rusange. Hanaganiriwe ku marushanwa y’imidugudu nk’igikoresho cyafashije kongera imikoranire, kuzamura ipipimo bitandukanye guhangana mu iterambere no kwihutisha ishyirwa mu bikorwa ry’imihigo ku rwego rw’imidugudu N'Akarere muri rusange.

Nyuma y’ibiganiro, itsinda ry’Akarere ka Karongi ryakomereje uruzinduko mu Murenge wa Byimana, Akagari ka Kamusenyi, basura Ishuri ry’Ubuyobozi rihari, aho bagaragarijwe uko rikora , uburyo abahugurwa bitabira amasomo n’inyungu abaturage bagenda babonamo.

Abashyitsi bagaragaje ko bungutse byinshi ku bunararibonye bw’Akarere ka Ruhango, by’umwihariko ku buryo ibikorwa by’ishuri ry’ubuyobozi n’amarushanwa y’imidugudu byahujwe n’intego z’iterambere ry’Akarere n’igihugu muri rusange. Banashimye imiyoborere myiza n’ubufatanye hagati y’inzego z’ubuyobozi n’abaturage.

Ubuyobozi bw’Akarere ka Ruhango bwashimangiye ko uru ruzinduko ari intambwe ikomeye mu guhana ubumenyi n’ubunararibonye hagati y’inzego z’ibanze, ndetse bunagaragaza ko Akarere ka Ruhango kazakomeza gufungurira amarembo izindi nzego zifuza kwigira ku bikorwa byiza bikorwa.