Akarere ka Ruhango kizihije Umunsi Mpuzamahanga w'Umwana w'Umunyafurika ku rwego rw'Akarere mu gikorwa cyabereye mu Rwunge rw'Amashuri rwa Notre Dame de Lourdes Byimana, ruherereye mu Murenge wa Byimana. Iki gikorwa cyateguwe ku bufatanye n'umufatanyabikorwa, gifite insanganyamatsiko igira iti: "Ndera neza, Nkure nemye."

Uyu munsi wahuje inzego z'ibanze, inzego z'umutekano, inzego z'uburezi, abafatanyabikorwa mu iterambere, abanyeshuri ndetse n'abaturage, bose bahurira ku ntego yo gushimangira uburenganzira bw'umwana no kumusigasira ubuzima, uburezi n'imikurire myiza.

Mu butumwa bwatanzwe, hibanzwe ku nshingano za buri wese mu kurinda no kurengera umwana, kumurinda ihohoterwa iryo ari ryo ryose no kumutoza indangagaciro zimufasha gukura neza no kuba umuturage mwiza uzagira uruhare mu iterambere ry'Igihugu.

Abitabiriye iki gikorwa banashishikarijwe gukomeza gufatanya mu kubaka umuryango utekanye urangwa n'uburere buboneye, aho abana bahabwa amahirwe angana yo kwiga, gukina no gukura mu bidukikije bibafasha kugera ku nzozi zabo.

Mu rwego rwo gushimira no gushishikariza abanyeshuri gukomeza kwitwara neza, hatanzwe ibihembo n'ibikoresho by'ishuri ku banyeshuri n'amakipe yagaragaje indashyikirwa mu marushanwa n'ibikorwa bitandukanye byateguwe mu kwizihiza uyu munsi.