Iki gikorwa cyabimburiwe n’urugendo rwo kwibuka rwatangiriye ku muhanda wa kaburimbo, hafi y’Ishami rya Banki ya Kigali mu Ruhango, rusorezwa ku Rwibutso rw’Akarere ruherereye mu Mudugudu wa Nyarusange I, Akagali ka Nyamagana. Hakurikiyeho isengesho, gushyira indabo kuri uru Rwibutso no kunamira inzirakarengane zisaga ibinumbi 20 zihashyinguye.

Kwibuka byakomereje ku bibuga by’Akarere by’imikino y’intoki (Volley ball na Basketball) ahatangiwe ikiganiro ku mateka y’itegurwa n’ikorwa rya Jenoside yakorewe Abatutsi mu Rwanda, ubutumwa mu ndirimo, mu muvugo, ubuhamya bw’inzira y’umusaraga abahigwaga banyuzemo mu gihe Jenoside yakorwaga, Ubutumwa bw’umuyobozi wa Ibuka mu Karere n’ubw’Umuyobozi w’Akarere.

Uwatanze ikiganiro ku mateka y’itegurwa n’ikorwa rya Jenoside yakorewe Abatutsi mu Rwanda (Rusanganwa Théogène) yerekanye neza uburyo Jenoside yateguwe n’ubutegetsi kuva kera, ikageragezwa ahantu hanyuranye no mu bihe binyuranye, umwaka wa 1994 ukaza ari indunduro y’ibyari byarateguwe. Ahereye ku ngero z’ibyabaye mu mateka yerekenye ukuntu gutegura Jenoside bikorwa n’ubutegetsi, ikaba idashoboka igihe yaba idahagarikiwe na bwo. Ati “Kugira ngo Jenoside ibeho, irategurwa, ikigishwa, igashyigikirwa n’ubuyobozi”. 

Ibi bikwiye kubera buri wese impamvu yo kwamaganira kure abantu bose bashaka gupfobya Jenoside yakorewe Abatutsi mu Rwanda bavuga ko kwica Abatutsi byatewe n’ihanurwa ry’indege y’uwari Umukuru w’Igihugu.

Rusanganwa kandi yahamagariye abantu bose, by’umwihariko urubyiruko, kurwanya ingengabitekerezo ya Jenoside aho iva ikagera no gufatira urugero ku rubyiruko rwahagaritse Jenoside rukunga Abanyarwanda, rukubaka Igihugu kikaba kigeze aho gitangaza amahanga, maze bagaharanira ko ibyagezwego biramba kandi bigakomeza kwiyongera ku bwinshi.

Perezida wa IBUKA mu Karere, Munyanziza Narcisse, yashimiye Ingabo zari iza FPR Inkotanyi zabohoye Igihugu zikarokora abahigwaga bari bataricwa, zigahumuriza Abanyarwanda, ubu buri Munyarwanda wese akaba atekanye aho ari hose mu gihugu.

Yibukije ko Abanyarwanda twese dufite umwenda wo kwibuka abishwe bunyamaswa bazira akarengane, kugira ngo bitazasubira ukundi aho ari ho hose ku Isi. Ati “Abacu tubafitiye umwenda wo guhora tubibuka. Tuzahora tubibuka ku bw'urupfu rw'akarengane bishwe… Tugomba kwibuka ikibi cyabaye, tukamenya ko tugomba kukirwanya”.

Umuyobozi w’Akarere, Habarurema Valens, we yagaragaje ko urubyiruko rwahawe umwihariko mu bikorwa byo kwibuka ku nshuro ya 25 Jenoside yakorewe Abatutsi.

Ati “U Rwanda rwahitsemo kubibutsa ko ari mwe mufite intwaro y'ubumwe n'amajyamabere u Rwanda rushaka”.

“Turabasaba ko amateka mabi yababera ishingiro ryo kwanga ikibi cyose”.

Ahereye ku myaka 25 ishize u Rwanda ruvuye muri Jenoside, yagaragaje ko umuntu ugeze mu kigero kingana n’iyo myaka ashobora guhabwa inshingano zo kuyobora mu byiciro bunyuranye.

Bityo ahereye ku kuba bashobora guhabwa inshingano zikomeye zo kuyobora yasabye urubyiruko kwanga ikibi, guharanira ikiza n’uko  u Rwanda rukomeza kugana aheza.

Ati “Nimushingire kuri ibyo bibi byabaye bibafashe kubyanga bityo duteze u Rwanda rwacu imbere”. 

Insanganyamatsiko yo kwibuka ku nshuro ya 25 Jenoside yakorewe Abatutsi mu Rwanda iragira iti ”Kwibuka Twiyubaka”.

Iki gikorwa cyo gutangira icyumweru cy'Icyunamo cyo Kwibuka ku nshuro ya 25 Jenoside yakorewe Abatutsi mu Rwanda mu 1994, ku rwego rw’Akarere kitabiriwe n’Umuyobozi w'Akarere, Umuyobozi w'Akarere wungirije ushinzwe iterambere ry'ubukungu, Umuyobozi w'Akarere wungirije ushinzwe imibereho myiza y'abaturage, Umuyobozi w'Umuryango RPF ku rwego rw'Intara y'Amajyepfo, Umuyobozi w'Ingabo, uw’Inkeragutaabara n'uwa Polisi mu Karere, Umunyamabanga Nshingwabikorwa w’Akarere, Umuyobozi w’Imirimo rusange mu Karere, n'abakozi bakorera ku Kicaro cy'Akarere, Abayobozi ku rwego rw'Umurenge  n'abaturage benshi.