Ubu butumwa bwagarutsweho n’abayobozi banyuranye bitabiriye Siporo rusange (Sport de Masse) yabaye kuri iki cyumweru tariki ya 16 Ukwakira 2018 mu Mirenge yose y’Akarere ka Ruhango.

Umuyobozi w’Akarere wungirije ushinzwe imibereho myiza y’abaturage, Mukangenzi Alphonsine, wakoranye siporo n’abatuye mu Mujyi wa Ruhango, yabasabye gukunda gukora siporo, kandi bakabigira umuco.

Yagize ati “Turabakangurira gukunda gukora siporo kuko ituma umuntu agira ubuzima bwiza, ubuzima buzira umuze”.

Gukora siporo ngo birinda indwara z’umuvuduko w’amaraso uterwa n’ibinure byirunda mu mitsi bikabuza amaraso gutembera neza kugira ngo abashe kugera mu bice byose by’umubiri mu buryo bworoshye.

Umuyobozi w’Ikigo Nderabuzima cya Nyarurama giherereye mu Murenge wa Ntongwe, Habimana Israel, avuga ko iyo umubiri tuwuhaye amasukari (mu biribwa n’ibinyobwa) udakeneye gukoresha uyahindura ibinure ukabibika mu minsi, maze bigatuma umubyimba w’inzira y’amaraso uba muto, inzira igafungana.

Avuga kandi ko ibyo bituma umutima ukoresha imbaraga nyinshi kugira ngo ubashe kugeza amaraso mu bice byose by’umubiri, bigatera indwara z’umuvuduko w’amaraso (Blood pressure).  

Ku rundi ruhande, ngo ubwinshi bw’ibinure mu mubiri butuma amagufwa aremererwa cyane, bikayasaba imbaraga nyinshi kugira ngo abashe kubitwara. Ibi na byo ngo bituma umunyungugu wa karisiyumu uba muke mu magufwa, bikayatera horoha cyane, akaba yakwangirika cyangwa akavunika ubusa.   

Habimana agereranya gutwara ibiro byinshi kw’amagufwa no gufata umuntu ufite ibiro 50 ukamukorera umuzigo w’ibiro 100. Ati “N’iyo yabasha kubyikorera byanze bikunze bigira ingaruka ku buzima bwe, kandi iyo abikora kenshi bimugabanyiriza iminsi yo kubaho”.

Gukora siporo rero ngo bifasha kugira ubuzima bwiza, kuko ituma umubiri ukoresha ya sukari yahindutse ibinure bikirunda mu mitsi ikabuza amaraso gutembera neza, bityo imitsi ikazibuka, amaraso agatembera neza.

Ati “Iyo ukora siporo umubiri ukenera gukoresha ya sukari, ugatwika bya binure byitsindagiye mu mitsi, ikazibuka, amaraso agatembera neza”.  

Gukora siporo rero ngo bituma umutima ubasha kugeza amaraso mu bice byose by’umubiri bidasabye imbaraga nyinshi, bikarinda indwara z’umuvuduko w’amaraso.

Uyu muyobozi akaba ashishikariza abafite umubyibuho ukabije kujya bakora urugendo rw’amaguru kuva ku birometero bibiri kugera kuri bidandatu, bakabikora nibura inshuro enye mu cyumweru.  

Siporo rusange ku baturage b’Akarere ka Ruhango ni umwe mu mihigo y’Akarere muri uyu mwaka wa 2018-2019. Ikorwa ku cyumweru cya gatatu cya buri kwezi, ikitabirwa n’abaturage, abayobozi ku nzego zose, n’inzego z’umutekano. Kuri uyu munsi kandi ababishaka bafatirwa ibipimo by’umuvuduko w’amaraso n’iby’isano hagati y’ibiro n’uburebure (BMI). Abo ibipimo bitameze neza bagirwa inama zibafasha gukomeza kugira ubuzima bwiza.