Ubutumwa bwatanzwe mu muganda rusange w’ukwezi kwa Mata kwa Mata wabaye kuri uyu wa gatandatu tariki 27 Mata 2019. Ku rwego rw’Akarere wabereye mu Mudugudu wa Kirengeri, Akagali ka Kirengeli, mu Murenge wa Byimana ahabaye ibikorwa by’isuku mu kigo cya ETEM kizaberamo Urugerero rw’Akarere ruciye ingando ruteganyijwe gutangira mu ntangiriro za Gicurasi 2019.

Mu butumwa bwatanzwe, Nikuze Denyse ushinzwe guhuza ibikorwa bya Gahunda y’ubwizigame bw’igihe kirekire-Ejo Heza mu Karere ka Ruhango yasobanuriye abaturage iby’iyi gahunda, uko kwiyandikisha bikorwa, uko kuzigama bikorwa n’ibindi byose birebana n’iyi gahunda.

Abatanze ibitekerezo bagaragaje inyota yo kumenya neza iyi gahunda, basaba kwegerwa kugira ngo bayisobanukirwe kurushaho. Umuhuzabikorwa w’iyi gahunda akaba yabasezeranyije kubaba hafi, asaba abayobozi b’amatsinda n’amakoperative anyuranye kujya bamutumira mu nama bakora kugira ngo abasobanurire byimbitse. Yanatanze nimero ya telefoni ukeneye ibisobanuro wese yamuhamagraho.

Umuyobozi w’Akarere wungirije ushinzwe iterambere ry’ubukungu, Rusilibana Jean Marie Vianney, yabwiye abaturage ko iyi gahunda igamije gufasha buri muntu wese kuzigamira iza bukuru kuva akiri muto, kugira ngo igihe azaba atagishoboye gukora azabone ibimutunga n’ibimufasha gukemura ibibazo byose, atabaye umuzigo ku muryango cyangwa ku gihugu.

Uyu muyobozi na we akaba yashishikarije buri wese kwitabira iyi gahunda kandi kuzigama bikaba umuco. 

Muri uyu muganda hanatanzwe ubutumwa ku kwirinda impanuka z'umuriro w'amashanyarazi, kurwanya ruswa n'akarengane, kumenyekanisha Ihuriro ry'abanyeshuri bo mu Mashuri makuru na za Kaminuza (District University Students Associations Forum) no gusaba ubufatanye bw'ubuyobozi mu kwesa imihigo.