Akarere ka Ruhango kasoje ku mugaragaro ibikorwa bya District JADF Open Day, byabaye kuva ku wa 24 kugeza ku wa 26 Kamena 2026, bikabera muri Gare ya Ruhango. Ibi bikorwa byahuje abafatanyabikorwa b'Akarere, abaturage n'inzego zitandukanye, hagamijwe kugaragaza ibikorwa by'iterambere byagezweho ndetse no gutanga ubujyanama ku buryo abaturage bakomeza kwiteza imbere.

Mu minsi itatu y'iri murikabikorwa, abafatanyabikorwa batandukanye bamuritse serivisi n'ibikorwa byabo, banatanga amakuru n'ubujyanama bifasha abaturage kumenya amahirwe ari mu nzego zitandukanye no kubyaza umusaruro gahunda za Leta zigamije imibereho myiza n'iterambere rirambye.

Mu ijambo ry'Ubuyobozi bw'Akarere ka Ruhango, hashimiwe abafatanyabikorwa ku ruhare rukomeye bakomeje kugira mu kwihutisha iterambere ry'Akarere no kuzamura imibereho myiza y'abaturage. Basabwe gukomeza kunoza imikoranire no gushyira imbaraga muri gahunda zifasha abaturage kwikura mu bukene no kugera ku rwego rwo kwigira (Graduation), binyuze mu bikorwa bibaha ubushobozi bwo kwiteza imbere mu buryo burambye.

Mu gusoza iki gikorwa, hatanzwe ibihembo ku bafatanyabikorwa bitwaye neza kurusha abandi mu gutanga umusanzu wabo mu iterambere ry'Akarere. Ibi bihembo byari birimo ibikombe, imidari n'impamyabushobozi (Certificates) mu rwego rwo kubashimira no kubashishikariza gukomeza gukora neza.

District JADF Open Day ni gahunda igamije gukomeza gushimangira ubufatanye hagati y'Akarere n'abafatanyabikorwa mu iterambere, guteza imbere imikoranire no kugaragariza abaturage ibikorwa n'ibisubizo bitangwa n'inzego zitandukanye