Kuri uyu wa gatandatu tariki 28 Nzeri 2019 nibwo mu gihugu hose hakozwe umuganda rusange usoza uku kwezi.  Nk’ahandi hose mu Gihugu, mu Karere ka Ruhango umuganda wabereye mu Midugudu n’Utugali bigize Akarere.

Ku rwego rw’Akarere wabereye mu Mudugudu wa Gitwa, Akagali ka Rutabo, Umurenge wa Kinazi ahakozwe ibikorwa byo gutunganya imihanda y’imigenderano muri uyu mudugudu washyizwe muri gahunda y’Imidugudu ntangarugero, urugero rw’ibishoboka, hanakorwa ibikorwa byo guhanika igisenge cy’inzu yubakirwa umusaza utishoboye, Magaruka Leopold; kubakira uyu musaza bikaba bikorwa muri Gahunda ya Ruhango ikeye igamije gukemura ibibazo bibangamiye imibereho myiza y’abaturage n’ibihungabanya umutekano.

Witabiriwe n’Umuyobozi w'Akarere, Habarurema Valens, Umuyobozi w'Imirimo rusange mu Karere, Abayobozi b’inzego z’umutekano ku rwego rw’Akarere, Umunyamabanga Nshingwabikorwa w'Umurenge, Abakozi bakorera ku Kicaro cy'Akarere, Abakozi b’Umurenge n’abaturage b’Akagali ka Rutabo.

Ubutumwa bwatannzwe nyuma y’umuganda ni ubujyanye n'umunsi mpuzamahanga ngarukamwaka w'abageze mu za bukuru uba ku itariki ya 6 Ukwakira buri mwaka, ubutumwa bujyanye n'ukwezi ko kuzirikana Ubumwe n'Ubwiyunge bw'Abanyarwanda, ubutumwa bukangurira abantu bose  kwirinda impanuka z'amashanyarazi, ubutumwa bwerekeranye no gukumira ruswa n'akarengane, uburebana n’ubufatanye bwa buri wese n’inzego zose mu kubumbatira umutekano bihereye mu miryango, n’uburebana no gukemura ibibazo bibangamiye imibereho myiza y'abaturage, by’umwihariko muri Gahunda yiswe Ruhango ikeye.

Umuyobozi w’Akarere yongeye gusobanurira abayobozi ndetse n’abitabiriye umuganda bose ko ubuyobozi bukuru bw’Igihugu cyacu bufite icyerekezo cy’uko buri Munyarwanda wese agomba kugira imibereho myiza, akagira ubuzima buzira umuze kandi akabaho atekanye.

Yibukije ko igihe cyemerenyijweho cyo kuba ibibazo bibangamiye imibereho myiza y’abaturage byamaze gukemuka cyegereje, asaba buri wese gukomeza kugira umwete mu gushyira mu bikorwa uruhare asabwa. Yasabye kandi buri muntu wese kudahuga na gato mu gushyira mu bikorwa iki cyerekezo ubuyobozi bukuru bw’Igihugu bwashyizeho ku bijyanye n’imibereho myiza y’abaturage ndetse n’umutekano.

Meya Habarurema yasoreje ijambo rye ku butumwa bukangurira ababyeyi kuboneza urubyaro, babyara abo Igihugu gisobora kurera, abo bazabasha kubonera ibyangombwa byose bizatuma bagira ubuzima n’imibereho myiza nk’uko Igihugu kibyifuriza buri mwese.    

Muri rusange mu Mirenge yose umuganda waranzwe n’ibikorwa byo gufata neza imihanda (guharura no kwagura imihanda, ndetse no gusibura inzira z'amazi-rigoles), gusiza ibibanza by'amashuri, gutunda amabuye n'imicanga bizakoreshwa mu kubaka amashuri, kubumba amatafari yo kubaka amazu n'ubwiherero by'abatishoboye, kubumba amategura yo gusakara ubwiherero n'amazu y'abatishoboye, gutunganya uturima tw'igikoni, gutunganya ibibuga by’imikino.

Mu Murenge wa Ruhango ho hanabaye igikorwa cyo gutangiza ku mugaragaro igihembwe cy'ihinga 2020A, haterwa imbuto y'ibigori kuri hegitari imwe kuri ebyiri zateguwe muri Bunyogombe aho umuganda wabereye ku rwego rw'Umurenge.

Muri Ntongwe ho hanasibuwe umuyoboro w'amazi meza hanashyirwamo amatiyo ku burebure bwa kirometero imwe (km1). Ibikorwa byo gutunganya uyu muyoboro bikaba bikorwa ku bufatanye bw’Akarere na Caritas Rwanda.

Uretse abayobozi bakoreye umuganda mu Murenge wa Kinazi aho wabereye ku rwego rw'Akarere, Umuyobozi w'Akarere wungirije ushinzwe imibereho myiza y'abaturage na we yakoreye umuganda mu Murenge wa Byimana aho yanashoje ku mugaragaro ukwezi kwahariwe gutoza abana gusoma kuva bakiri bato.