Mu Karere ka Ruhango habereye Inama y'Uburezi yahuje ubuyobozi bw'Akarere, abagize Inama y'Umutekano Itaguye, Abanyamabanga Nshingwabikorwa b'Imirenge, abayobozi b'ibigo by'amashuri, abashinzwe uburezi ku rwego rw'Akarere no mu Mirenge ndetse n'abandi bafatanyabikorwa mu rwego rw'uburezi.

Iyi nama yibanze ku gusuzuma ishusho rusange y'uburezi mu Karere, isesengura uko imyigire n'imyigishirize bihagaze, ndetse n'imiterere y'ibisubizo by'abanyeshuri mu bizamini, hagamijwe gukomeza gushyira imbaraga mu gutanga uburezi bufite ireme no kuzamura umusaruro w'uburezi.

Abitabiriye inama baganiriye ku ngamba zo gukomeza kunoza imyigishirize, guteza imbere imitsindire y'abanyeshuri no gukemura imbogamizi zigaragara mu rwego rw'uburezi, bibanda ku bufatanye bw'inzego zose kugira ngo intego z'Akarere zo guteza imbere uburezi zigerweho.

Mu myanzuro yafatiwe muri iyi nama harimo gukomeza kwita ku mutekano n'isuku by'abanyeshuri mu bigo by'amashuri, kwishyurira ku gihe amakoperative ashinzwe gucunga umutekano w'ibigo, gucunga neza ibiribwa n'ibikoresho by'amashuri, gukomeza gukurikirana no guteza imbere imyitwarire myiza y'abarimu n'abanyeshuri, ndetse no gukomeza gusobanurira abarimu akamaro ko kwizigamira muri gahunda ya EjoHeza kugira ngo barusheho kwiteganyiriza ejo hazaza.

Ubuyobozi bw'Akarere bwashimangiye ko ireme ry'uburezi ari inkingi y'iterambere rirambye, busaba buri wese ufite aho ahurira n'uburezi gukomeza kugira uruhare mu kubaka amashuri atekanye, arangwa n'isuku, imiyoborere myiza n'imyigire itanga umusaruro, hagamijwe kurera abana bafite ubumenyi, indangagaciro n'ubushobozi bwo kugira uruhare mu iterambere ry'Igihugu.