Kuwa 07 Nyakanga 2026, Akarere ka Ruhango katangiye igikorwa cyo gusuzuma ishyirwa mu bikorwa ry'Imihigo y'umwaka wa 2025/2026, kiyobowe n'itsinda ryaturutse mu Kigo cy'Igihugu cy'Ibarurishamibare (NISR) riyobowe n'Intumwa y'Umuyobozi Mukuru w'iki kigo. Iri tsinda ryakiriwe n'Ubuyobozi bw'Akarere, mu gikorwa cyitabiriwe n'abagize Inama y'Umutekano Itaguye y'Akarere, Abagize Inama Njyanama y'Akarere, Biro ya JADF ndetse n'Imboni z'Imihigo ku rwego rw'Akarere.

Isuzuma riteganyijwe kumara iminsi itatu, kuva ku wa 07 kugeza ku wa 09 Nyakanga 2026. Muri uyu mwaka w'ingengo y'imari wa 2025/2026, Akarere ka Ruhango kari gafite Imihigo 142, igizwe n'Imihigo 45 mu rwego rw'Iterambere ry'Ubukungu (Economic Transformation), 68 mu rwego rw'Imibereho Myiza y'Abaturage (Social Transformation) na 29 mu rwego rw'Imiyoborere Myiza (Good Governance), yose ikaba yarashyizwe mu bikorwa ku kigero cya 100%.

Ku munsi wa mbere w'isuzuma, hibanzwe ku igenzura ry'inyandiko, ibimenyetso na raporo zigaragaza uko Imihigo yashyizwe mu bikorwa. Mu minsi ikurikiraho, itsinda rya NISR rizasura ibikorwa bitandukanye byagezweho mu Mirenge, Utugari n'Imidugudu hagamijwe kugenzura no kwemeza ibyagezweho ku rwego rw'Akarere.

Ubuyobozi bw'Akarere bwagaragaje ko isuzuma ry'Imihigo ari umwanya mwiza wo kugaragaza ibyo abaturage bamaze kugeraho binyuze mu mikoranire y'inzego zitandukanye, bunashimangira ko Akarere kazakomeza gushyira imbere serivisi nziza n'iterambere rirambye rigamije kuzamura imibereho y'abaturage.