Kuri iki cyumweru tariki 27 Kanama 2023, mu Mirenge igize Akarere ka Ruhango habaye Siporo rusange yitabiriwe n’abato n’abakuru, abayobozi n’abayoborwa.

Mu Karere ka Ruhango, gahunda ya siporo rusange ku rwego rw’Imirenge iba ku cyumweru cya kane cy’ukwezi, mu gihe ku rwego rw’Akarere siporo rusange ikorwa ku cyumweru cya kabiri cy’ukwezi.

Siporo rusange y’uyu munsi, mu Murenge wa Ruhango yabereye mu mujyi wa Ruhango, yitabirwa n’Umuyobozi w’Akarere, Habarurema Valens, abayobozi b’inzego z’umutekano ku rwego rw’Akarere n’abagize izo nzego bakorera mu Murenge wa Ruhango, abagize amatsinda asanzwe akora siporo mu mujyi wa Ruhango, n’abaturage muri rusange.

Yaranzwe ahanini no kwiruka n’amaguru, ndetse n’imyitozo yo kunanura imitsi no kugorora ingingo yabereye ku kibuga cy’umupira w’amaguru giherereye i Kibingo mu Kagali ka Munini, hirya y’ahazwi nko kwa Yezu Nyirimpuhwe.

Nyuma ya siporo habaye igikorwa cyo gupima ku bushake indwara zitandura (Umuvuduko w’amaraso & diyabete), hanatangwa ubujyanama, by’umwihariko ku bagize ibipimo bitari byiza.

Mu butumwa Umuyobozi w’Akarere yagejeje ku bitabiriye siporo rusange, yakanguriye buri muntu wese gukunda gukora siporo kandi bikaba umuco, kuko nk’uko insanganyamatsiko y’uyu munsi (“Kora siporo ugire ubuzima bwiza”) ibivuga, “siporo ni isoko y’ubuzima bwiza”.  

Mu bundi butumwa bwahawe abitabiriye siporo rusange mu yindi Mirenge, harimo gukangurira abahinzi-borozi gushyira imbaraga mu gutegura neza igihembwe cy’ihinga 2024A, kwibutsa abanyamuryango ba mitiweri batararangiza gutanga umusanzu wabo kubikora vuba, no gukangurira abataritabira kuba abanyamuryango ba gahunda y’ubwizigame bw’Igihe kirekire ya Ejo Heza kwiyandikisha no kuzigama, abasanzwe ari abanyamuryango na bo bagakomeza kuzigama nk’uko babyiyemeje.