Kuri uyu wa gatatu tariki 27 Nzeri 2023, mu Mudugudu w’Ikitegererezo wa Karama (Karama IDP Model Village) uherereye mu Kagali ka Nyagisozi, Umurenge wa Ntongwe habaye umuganda udasanzwe wateguwe n’Inama y’Igihugu y’Abagore ku rwego rw’Akarere ka Ruhango.

Abitabiriye uyu muganda barimo Umuyobozi w’Akarere, Habarurema Valens, Perezida w’Inama Njyanama y’Akarere, Rutagengwa Gasasira Jérôme, Umunyamabanga Nshingwabikorwa w’Umurenge wa Ntongwe, Nahayo Jean Marie, bamwe mu bagize Komite Nyobozi ya CNF ku Karere no mu Murenge wa Ntongwe, Urubyiruko rw’Abakorerabushake (RYVCP) n’abaturage bo mu Kagali ka Nyagisozi.

Uyu muganda waranzwe no gutunganya umurima no guteramo ubwatsi kuri hegirari ebyiri. Ubwatsi bwatewe buzagaburirwa amatungo yororerwa mu gikumba cy’uwo mudugudu watujwemo imiryango 24 y'abarokotse Jenoside yakorewe Abatutsi mu 1994 batishoboye batari bafite amacumbi. 

Mu butumwa yagejeje ku bitabiriye uyu muganda, Umuyobozi w’Akarere yashimye Inama y'Igihugu y'Abagore yawuteguye, asaba ko, mu rwego rwo kwihaza mu biribwa, muri iki gihembwe cy'ihinga abaturage bahinga ubutaka bwose ntihagire igisambu na kimwe gisigara kidahinzwe, kandi ifumbire n’imbuto nziza.

Meya Habarurema yanagarutse ku cyumweru cyo kurwanya ruswa n'akarengane cyatangijwe ejo tariki ya 25 Nzeri 2023, maze asaba buri muntu wese kutazuyaza kumenyekanisha akarengane ako ari ko kose yagirirwa cyangwa yabona gakorerwa undi. Yabwiye kandi abaturage ko nta wukwiye kuzitirwa no kuba nta mafaranga yo guhamaraga afite muri terefoni, kuko Akarere gafite umurongo utishyurwa buri wese ufite terefoni irimo umuriro yabasha guhamagaraho; uwo murongo ukaba ari 4052. 

Perezida w'Inama Njyanama y'Akarere, Rutagengwa Gasasira Jérôme na we yashimye Inama y'Igihugu y'abagore yateguye iki gikorwa, ayisaba gukomeza kwita ku bikorwa by'ubukorerabushake no kurushaho gushyira imbaraga mu kurwanya no gukumira amakimbirane yo mu miryango.

Uyu muyobozi yanagarutse ku rubyiruko rwasoje amashuri yisumbuye muri uyu mwaka 2023 rukaba rwaratangiye urugerero (Inkomezabigwi 11), aho yabasabye kutiganda. Ati “Rubyiruko Igihugu cyabayaye umwanya n'ijambo kuko mufite igihe kinini cyo gukorera u Rwanda; nimukore urugerero mutiganda”.

Umuyobozi w’Inama y’Igihugu y’Abagore mu Karere, Madamu Uwimana Eugénie, yasabye ba mutimawurugo kwita ku mihigo y’Inama y’Igihugu y’abagore, harimo: Kugira nibura umurima w’igikoni kuri buri muryango; kugira nibura ibiti bibiri by’imbuto ziribwa kuri buri muryango; kurwanya no gukumira amakimbirane yo mu muryango; guharanira ko abana bose bageze igihe cyo kwiga baba bari mu ishuri no kwita ku isuku: ku mubiri, mu ngo, ku bikoresho, ku biribwa, aho abantu bagenda n’aho bakorera.  Ati “Buri wese aharanire kuba urumuri rumurikira abandi”.