Kuri uyu wa Gatanu tariki ya 12 Kamena 2026, mu Karere ka Ruhango habereye igikorwa cyo Kwibuka ku nshuro ya 32 abari abakozi n’imiryango y’abakoraga mu yahoze ari amakomini agize aka karere, bazize Jenoside yakorewe Abatutsi mu 1994. Muri uwo muhango, waranzwe no guha icyubahiro abazize Jenoside, Mukanziza Nelia watanze ubuhamya yavuze ko yarokotse abikesha ubutabazi bw'Ingabo za RPA-Inkotanyi, ashimangira ko umunsi yari yiteze kwicwa zaramurokoye we n'abo bari kumwe. Yashimiye kandi Leta y'Ubumwe bw'Abanyarwanda yakomeje gufasha abarokotse Jenoside kongera kwiyubaka.

Umuyobozi w'Akarere ka Ruhango, Habarurema Valens, yavuze ko guhagarika Jenoside no kurokora Abatutsi byashobotse kubera ubutwari bw'Ingabo za RPA-Inkotanyi. Yasabye abitabiriye uwo muhango n'Abanyarwanda muri rusange gukomeza kurinda no kwimakaza ubumwe bw'Abanyarwanda, kwamagana ingengabitekerezo ya Jenoside n'icyo ari cyo cyose cyakurura amacakubiri mu muryango nyarwanda. Yashimangiye ko kubungabunga amateka no kuyigiraho ari inshingano za buri wese kugira ngo Jenoside itazongera kubaho ukundi.

Mukanziza Nelia yavuze ko isomo rikomeye rikwiye gukurwa muri aya mateka ari ugukomeza kurinda ubumwe bw'Abanyarwanda, kwimakaza indangagaciro z'ubumuntu no kurwanya urwango rushingiye ku moko, inkomoko cyangwa ivangura iryo ari ryo ryose. Yagaragaje ko abarokotse Jenoside bakomeje guhumurizwa no kongera kubaka ubuzima bwabo babikesha ubuyobozi bwiza bwita ku mibereho yabo.

Imibare igaragaza ko hamaze kumenyekana abakozi 37 b'amakomini yahujwe akavamo Akarere ka Ruhango ariyo Ntongwe, Kigoma, Tambwe, Mukingi, Murama, Masango na Mushubati, bazize Jenoside yakorewe Abatutsi mu 1994, mu gihe ubushakashatsi bukomeje kugira ngo hamenyekane amakuru yose ajyanye n'aya mateka. Uyu muhango wasojwe no gushyira indabo ku rukuta rwanditseho amazina y'abari abakozi bishwe muri Jenoside yakorewe Abatutsi, mu rwego rwo kubunamira no kuzirikana umurage wabo.