Umuturage Nyabyenda Jean Bosco, utuye mu Kagari ka Nyamagana, Umurenge wa Ruhango, yashyikirijwe inzu nshya yubakiwe ku bufatanye bw’Ubuyobozi bw’Akarere ka Ruhango, Itorero ry’Abadivanti rya Ruhango, Polisi y’u Rwanda, abakorerabushake n’abaturage.

Iki gikorwa cyabaye mu rwego rwo guteza imbere imibereho myiza y’abaturage batishoboye, binyuze mu kubaha amacumbi aboneye abafasha kubaho neza no kwigira.

Ubuyobozi bw’Akarere ka Ruhango bwagaragaje ko iyi nzu yubatswe ari igihamya cy’akamaro k’ubufatanye hagati y’inzego z’ubuyobozi, amadini n’amatorero, inzego z’umutekano n’abaturage, mu gukemura ibibazo byugarije abaturage no kubaka imibereho myiza irambye.

Mu butumwa bwatanzwe n’ubuyobozi bw’Akarere, hashimiwe byimazeyo Itorero ry’Abadivanti rya Ruhango ku ruhare rukomeye rwagize muri iki gikorwa, hanashimwa n’andi madini n’amatorero agira uruhare mu bikorwa by’iterambere n’imibereho myiza y’abaturage.

Nyuma yo gushyikirizwa inzu, Umuturage Nyabyenda Jean Bosco yashyikirijwe impano zitandukanye zirimo ibiribwa, mu rwego rwo kumuremera no kumufasha gutangira ubuzima bushya mu nzu ye nshya.

Ubuyobozi bw’Akarere ka Ruhango bwongeye gushimangira ko bukomeza gushyira imbaraga mu gufasha abatishoboye, guteza imbere ubufatanye n’abafatanyabikorwa, no gukomeza ibikorwa bigamije kuzamura imibereho myiza y’abaturage bose.