Ibi bikubiye mu butumwa bwatangiwe mu mu gikorwa cyo gutangiza ku mugaragaro, ku rwego rw’Akarere, ubukangurambaga bugamije gushishikariza abagabo n’abana b’abahungu gushyigira uruhare rw’umugore n’umukobwa mu igenabikorwa, imihigo n’ingengo y’imari by’Igihugu.

Iki gikorwa cyateguwe ku bufatanye bw’Akarere n’Impuzamiryango Pro- Femmes Twese Hamwe cyabaye ku gicamunsi cyo ku wa kabiri tariki ya 9 Ukwakira 2019, kibera mu Mudugudu wa Busego, Akagali ka Bunyogombe mu Murenge wa Ruhango.

Ubutumwa bwatambutse mu makinamico abiri, iyakinwe n’abagabo bo mu Karere ka Ruhango baharanira impinduka mu bijyanye n’uburinganire n’ubwuzuzanye bw’abagabo n’abagore, n’iyakinwe n’abakinnyi banyuranye basanzwe bakina mu matorero azwi ku rwego rw’Igihugu nk’Indamutsa n’Urunama bwerekanye ko umuryango urangwamo kwikunda kw’abagabo, guharira abagore imirimo yose, kwima abagore umwanya wo kwitabira inama, ibikorwa rusange, kwishyira hamwe n’abandi mu matsinda agamije kwiteza imbere, kubabuza gutanga bitekerezo biganisha ku ifatwa ry’ibyemezo mu rugo cyangwa mu nzego z’imiyoborere, uwo muryango uhora mu bukene n’ibindi bibazo by’urudaca.

Ku rundi ruhande umuryango urangwamo ubwumvikane, ubwubahane, ubufataye n’ubwuzuzanye urangwamo amahoro, ukabasha kugera ku iterambere, Igihugu na cyo kikahungukira.

Intumwa yari ihagarariye Umuyobozi w’Umuryango Care International Rwanda muri iki gikorwa yashimiye abagabo bagaragaje impinduka nziza mu bijyanye n’uburinganire n’ubwuzuzanye, abasaba gukomeza gushishikariza abandi gutera intamwe muri iyo nzira.

Ati “Turashimira abagabo b’indashyikirwa biyemeje guhindura abandi bagabo bagenzi babo; mu by’ukuri iyo ugize ibyiza ukabigumana, ukabyihererana nawe ntabwo uba wubaka.”

Umuyobozi w’Akarere wari Umushyitsi Mukuru muri iki gikorwa, yibukije zimwe muri gahunda za Leta zishimangira uruhare rungana hagati y’abagabo n’abagore muri gahunda ziteza imbere Igihugu.

Yagarutse ku Ihame ry’uburinganire n’ubwuzuzanye mu muryango utekanye nk’imwe mu nkingi z’iterambere ry’Igihugu; Itegeko Nshinga rya Repubuloka y’u Rwanda riteganya ko nibura imyanya 30 % mu nzego zifata ibyemezo iharirwa abagore; gahunda ya Guverinoma y’imyaka irindwi iteganya guteza imbere uburinganire n’ubwuzuzanye bw’abagore n’abagabo, ndetse no guteza imbere umuryango kugira ngo iterambere rirambye kandi ridaheza ribashe kugerwaho.

Yavuze kandi ko iterambere ry’Akarere ridasobora kugerwaho abagabo n’abagore badafatanyije, dore ko n’imibare yabo ijya kungana.  

Ubu bukangurambaga buzamara amezi atatu; bwateguwe hagamijwe gukangurira abagabo kudaharira abagore imirimo no kutababuza kwitabira inama na gahunda nyinshi zitangirwamo ibitekerezo bishingirwaho mu gufata ibyemezo biganisha ku iterambere ry’imiryango n’iry’inzego babarizwamo.

Bwateguwe kandi muri gahuda y’ibikorwa by’Umushinga “Buri Jwi rifite agaciro” ushyirwa mu bikorwa n’Impuzamiryango Pro Fememe Twese Hamwe ku kunga ya Care International na Minisiteri y’Ububanyi n’amahanga y’Igihugu cy’u Buholandi.

Iki gikorwa cyanitabiriwe n’Umuyobozi w'Akarere wungirije ushinzwe imibereho myiza y'abaturage, Umuyobozi Nshingwabikorwa wa Pro Femmes Twese Hamwe, Intumwa ya Ambasade y’u Buholandi, Abahagarariye Imiryango ihuriye muri  Pro Femmes Twese Hamwe, Umuhuzabikorwa CNF ku rwego rw'Intara y'Amajyepfo, Intumwa y'Umuyobozi  wa Care International Rwanda, Umunyamabanga Nshingwabikorwa w'Umurenge wa Ruhango, Abahagarariye inzego z'Umutekano n’abaturage benshi.