Kimwe n’ahandi hose mu Gihugu, mu Mirenge igize Akarere ka Ruhango umuganda rusange w’ukwezi kwa Mutarama 2023 wabaye ku wa gatandatu no ku cyumweru tariki ya 28 na 29 Mutarama, wibanda ku bikorwa byo kurwanya isuri, gufata neza imihanda no gukemura ibibazo bibangamiye imibereho myiza y’abaturage. Hanabaye umuganda ushingiye ku bumenyi wakozwe n'abakora muri serivise z'ubuvuzi, n'abafundi; abaganga bapimye indwara zitandura banatanga ubujyanama, abafundi bakora ibikorwa byo kubaka amazu, by'umwihariko muri gahunda yo gukemura ibibazo bibangamiye imibereho y'abaturage (HSIs,...).

Ku wa gatadatu tariki 28 Mutarama 2023, Ubuyobozi bw’Akarere n’Abadepite mu Nteko Ishinga Amategeko bifatanyije n’abaturage mu Mirenge ya Byimana na Ntongwe mu buryo bukurikira: Umuyobozi w'Akarere, Habarurema Valens, Depite Uwanyirigira Gloriose na bamwe mu bayobozi b'Inzego z'Umutekano ku Karere bakoranye umuganda n'abaturage bo mu Kagali ka Kayenzi, Umurenge wa Ntongwe. Muri uyu muganda wabereye mu Mudugudu wa Kirwa hacukuwe imirwanyasuri hanasiburwa isanzwe kuri hegitari eshanu (5ha). Ku biro by'Akagali habereye igikorwa cyo gupima ku bushake indwara zitandura, no gutanga ubujyanama ku basanzwemo bipimo bitameze neza. 

Depite Murara Jean Damascène ari kumwe n'Umuyobozi w'Akarere Wungirije Ushinzwe iterambere ry'ubukungu, Rusilibana Jean Marie Vianney hamwe n'inzego z'umutekano bakoranye umuganda n'abaturage mu Kagali ka Muhororo, Umurenge wa Byimana, bakora ibikorwa birimo guhanga imirwanyasuri no gusubura isanzweho (3ha), gufata neza umuhanda (3km) no gutunda umucanga wo kubaka ibiro by'Akagali. 

Nyuma y'umuganda hatanzwe ubutumwa burebana n'uburyo bwashyizweho bwo kubona amakuru kuri serivise z'imari bishingiye ku Itegeko No017/2021ryo ku wa 3/3/2021 rirebana no kurengera umuguzi wa serivise z’imari. Mu gushyira mu bikorwa ibikubiye muri iryo tegeko Banki Nkuru y’u Rwanda yashyizeho imbuga ebyiri zifasha abantu kumenya amakuru kuri serivise z’imari, ari zo  “Geraranya” (www.gereranya.bnr.rw na Application yayo kuri Telefoni zigendanwa) na “Intumwa chart Board”; iri koranabuhanga izajya rifasha gutanga ikibazo/igitekerezo ushaka guha banki ukorana na yo. Ubu buryo buzafasha abadakoresha telefoni zigezweho kuko bufite uburyo bwo kohereza ubutumwa busanzwe kuri 6005. Bunakoresha whatsapp (0791 700 721). 

Mu butumwa bwagarutsweho kandi harimo ubwo gushishikariza abacuruzi n'abaguzi gutanga no gusaba buri gihe inyemezabuguzi (factures) za EBM, ubwo gushishikariza Abanyarwanda bose kugira umuco w'isuku n'isukura, n'ubuwerekeranye n’Umunsi Mukuru w'Intwari z'Igihugu uzizihizwa ku nshuro ya 29 ku nsanganyamatsiko igira iti “Ubutwari mu Banyarwanda agaciro kacu”. 

Depite Uwanyirigira Gloriose yagarutse by’umwihariko ku butumwa bwo gukangurira ababyeyi kwita ku kuboneza urubyaro, gukangurira ababyeyi kurushaho kwita ku burere bw'abana mu muryango, no ku ruhare rw'abagabo mu kugira umuryango umererwe neza.